Catholic Media Network

Mati Brgy. Central nasubo sa mga shooting incidents

Mati Brgy. Central nasubo sa mga shooting incidents

Gikataho nga nasubo ang Brgy. Central sa Mati sa mga panghitabong shooting incidents karon sa siyudad, kung diin natigayon gayod kini sa Brgy. Central. Giluwatan kini sa DXHM/DXDV news team ni Kagawad Jerome Gupit, ang nagkupot sa Committee on Peace and Order sa barangay council. Apan gipahayag pa niya nga nakig-coordinate na ang barangay sa kapulisan sa mga nahitabo. Gipasabot pa ni Gupit nga laraw nila karon agig lakang, mao ang pagpalig-on og mga purok tanod nga mao’y mamahimo unyang ka-alayon sa mga barangay tanod ug kapulisan sa ilang gimbuhaton, partikular na sa pagpani-id ug pag-monitor sa ilang tagsa-tagsa ka mga ginsakupan. Gibutyag pa niya nga sa mga nahitabo nga pagpusil patay, nag-ugat kini sa ginadiling droga. Busa hugot nga nakig-koordinar usab ang 106 nga purok sa Brgy. Central sa Barangay Anti-drug Abuse Council, kon BADAC. Ang Brgy. Central ang nagpadayag usab sa ilang pakig-unong sa Anti-Drug program ni President-elect Mayor Digong Duterte.

Ad Jesum Development Foundation Inc. (AJDFI)

Ang Microfinance program sa diyosesis sa Mati nagsaulog sa ilang ika-19 nga kasumaran sa niadtong Mayo 23, 2016. Gihalad sa mga trabahante niini sa ilang buhatan sa poblacion Mati ang Santos nga Misa sa pagpasalamat sa Ginoo sa mga grasya sa ilang pagpadayon sa pag-alagad, labi na sa pagbangon gikan sa mga kalisdanan nga gihatud sa Bagyong Pablo ug ubang pagsulay – pinansyal. Kahinumduman nga sa pagpanaw sa pikas kinabuhi sa kanhi directress niini, si anhing Sr. Bernadette Dollete, CSJ, gipulihan siya ni Sr. Melvin Manligoy, CSJ. Kaakibat sa Mati central unit mao ang Sta. Maria AJDFI unit sa Sta. Maria, Davao del Sur.

Sa laing bahin, sa DOSCST, agig sumpay sa miaging kalamboan, giluwatan ni Vice President for Extension and Research Roy Ponce sa pakighinabi sa DXHM/DXDV/TCTV news nga nakatutok usab ang State College sa pagpatuman og mga lakang aron makatabang sa pag-angat sa panginabuhi sa ilahang kommunidad. Gipasabot niya nga kini ang hinungdan kung nganong nagpatuman usab sila og mga proyekto nga makabenepisyo sa kommunidad, partikular na ang pagpananom nga nakita nilang daku kaayo og ikatabang aron makadugang sa pangita sa mga benepisyaryo. Kini ang usa sa mga gipalig-on sa administrasyon ni College Pres. Edito Sumile nga naglakip usab sa pagdawat sa tahas isip custodian sa shared service facility gikan sa buhatan sa DTI-Dvo Oriental Prov’l Office. (SR. MARIETTA ALO, CMN Mati)