Catholic Media Network

Spirit FM Ilusad; Davao SOCCOM Gipalig-on

Gipakusgan karon ang usa sa labing mahinungdanon nga ahensiya pastoral sa Arkidayosis sa Dabaw, ang Social Communications (Katilingbanong Komunikasyon) pinaagi sa pormal nga paglusad sa nag-inusarang Katolikong Radyo, ang DXGN 89.9 SPIRIT FM karong Lunes, Hunyo 13, 2016.

Usa ka Santos nga Misa ang pagasaulogon alas-12 sa udto sa San Pablo Parish isip maoy unang kalihukan alang sa pormal nga paglusad sa DXGN 89.9 SPIRIT FM.

Pagasundan kini sa usa ka programa sa St. John Paul II Hall diin pormal nga buksan ang official logo sa DXGN 89.9 SPIRIT FM nga itugyan ni Fr. Francis Lucas, ang managing director ug Chief Executive Officer sa Catholic Media Network (CMN) ngadto kang Arsobispo Romulo G. Valles, D.D.. Ang CMN mao ang network nga nagdumala sa tanang mga Catholic Radio ug TV stations sa tibuok Pilipinas nga mokabat na sa 46 ka mga miyembro.

Good News Radio
Unang gi-ablihan ang DXGN Good News Radio niadtong tuig 1998 apan ulahi kining nawagtang sa kahanginan niadtong tuig 2008 tungod sa daghang mga kakulian ug ang labing dakong hinungdan niini mao ang pagkadaot sa daan nga transmitter.

Taliwala sa temporaryong pagpakahilom sa Katolilko nga sibyahanan, gipahigayon ang pagpanubay sa tanang sektor kung unsa ang gisaligan nga tinubdan sa impormasyon gawas sa telebisyon. Migula sa maong pagtuon nga radyo ang ikaduhang tinubdan sa imporasyon ug daghan usab ang nanghinaut nga mahibalik ang radyo sa simbahan.

Tungod niini, gitawag ang kanhi nga mga nahilambigit sa DXGN ug mga eksperto sa komunikasyon aron nga sugdan ang paghimo ug usa ka feasibility study ug business plan alang sa posible nga pag-abli pag-usab sa sibyahanan.

Community Based Radio
Gawas nga usa ka relihiyoso nga estasyon, gi-han-ay usab nga mamahimong usa ka Community Based Radio ang mga programa sa bag-ong DXGN 89.9 Spirit FM.

Unang gihimo ang panglantaw, misyon, mga katuyuan aron mahan-ay ang direksiyon sa pagkab-ot sa mga tinguha sa estasyon nga mao ang pagpakaylap sa Maayong Balita ug aron nga mabag-o, mahibalik ug lig-onon ang mga tumutuo alang sa pagtukod sa Gingharian sa Diyos dinhi sa yuta.

Matod ni Fr. Ritsche Gamaya, director sa Archdiocesan Commission on Social Communications, mapasalamaton siya sa tanang mga wala nagpanuko nga mga pundok ug indibiduwal nga mihatag sa ilang suportang financial alang sa gikinahanglan nga kantidad aron mobalik sa kahanginan ang DXGN.

Usa sa nahaunang mitubag sa tawag sa suporta mao ang University of the Immaculate Conception kansang Presidente nga si Sr. Marissa Viri,RVM nagsugyot nga ipahigayon ang fund campaign nga gitawag ug “25 Sentabo ko, Para sa Radyo Ko.” Gipadagan gilayon nila kini sa ilang tanang mga departamento ug gihimong usa ka commitment sa tibuok unibersidad.

Mitubag usab sa fund campaign ang Aboitiz Foundation, Inc., ang Alexian Brothers, One Network Bank, EWTN, mga indibiduwal, ug ang Ateneo de Davao University.

Sa tunga-tunga sa tuig 2015, gi-planuhan ang usa ka dakong fund campaign nga gitawag ug “Dinner for a Cause” kansang major sponsor mao ang Mergrande Ocean Resort. Pinaagi sa maong event, gatusan pa ka mga indibiduwal ang mitambong kinsa gusto usab mga motabang sa pag-abli sa radyo.

“Gikan sa bag-ong transmitter ug sa mga modernong kahimanan sa studio, pinaagi sa grasya sa Ginoo, kinsa maoy naghatag ug inspirasyon sa mga tawo nga mitabang kanato sa pag-abli ug balik sa DXGN nga karon tawgon na nga SPIRIT FM,” si Fr. Gamaya nagkanayon.

Samtang gipangandaman ang mga kahimanan, gi-andam usab sa SOCCOM sa Archdiocese ang tanang sektor sa pagpakighilambigit pinaagi sa mga programa sa SPIRIT FM.

“Gihatagan nato ug luna ang tanang mga pastoral agencies, church organizations, mga parokya, mga tulunghaan, transparochial nga mga pundok,mga relihiyosong kalalaken-an ug kababayen-an lakip na ang atong mga Gagmay’ng Kristohanong Katilingban sa pagsibya ug pagtuman sa misyon alang sa pagsangyaw sa Maayong Balita,” midugang si Fr. Gamaya.

Gawas sa mga pag-ampo ug inadlaw nga Santos nga Misa ug Rosaryo, dunay mga pagtuki sa mga isyu sa katilingban pinaagi sa News and Current Affairs programs sama sa CMN Network News ug Ambit DXGN, Kristohanong Kalambuan alang sa Kalinaw sa Social Action Network. Samtang mga kalihukan ug mga kabag-ohan sa mga kabatan-onan nga nagserbisyo sa simbahan usab ang mapaminawan sa Youth Camp ug sa Kalakbay ni Kristo. Mga pagtulun-an alang sa Kristohanong Kinabuhi ang ginatuki sa Kristohanong Pamilya, Giya sa Pagtoo, Mariang Ina Ko!, Cenacle Hour, Bokasyon, Bililhong Gasa, Tingog sa Layko. Samtang mga Christian/Gospel, love songs, OPM ug uban pang mga top hits ang gi-dalit matag adlaw ug ang gikahinaman mao ang kasinatian sa pagtoo atol Kwento ng Ordinaryong Tao.

Pinaagi sa mga parokya ug base sa bag-ong GKK Norms and Guidelines, tagsa-tagsa nga gipalig-on ang mga sakop sa Social Communications Ministry sa gipahigayon nga RONDA PAROKYA aron nga mamahimong andam ang mga SOCCOM isip kabahin sa kinatibuk-ang network sa mga magsasangyaw pinaagi sa electronic media.

Gipadayag ni Arsobispo Valles ang kinasingkasing nga pasalamat sa tanang mga naminaw ug mihatag sa ilang talent, panahon ug tabang financial ug labaw sa tanan, “Nanghinaut kita nga padayon nga suportahan nato ang atong Catholic radio station, ang DXGN 89.9 Spirit FM.” (ANNIE LIBRES, CMN Davao)