Catholic Media Network

DZPA CMN News (July 2, 2016)

JULY 2, 2016 – Maysa manen a pammaltog ti napasamak ditoy Bangued idi malem di kalman diay Barangay Macray Bangued, iti agarup alas 5:56.

Iti report a naawat ti DZPA CMN news, nainaganan dagiti biktima a da Mark Chan Bulosan Testado, a nagsagrap ti tama ti akinkannawan a rupa, tengnged ken abaga na. Nairaman met ti pammaltog ni Edmund Palos a nagsagrap ti tama iti bala ti rupa ken teng-nged.

Sigun ti report iti Bangued PNP, ti suspetsa ket maysa a minor de edad ken mapapati a nausar ti pammaltog ket gauge 12 shotgun a saan a na-recover.

Basar ti report, dagiti biktima ti agturong iti motorsiklo a naggapu ti maysa a basketball game, idi daytoy ti inuray ti suspetsa asideg ti kalsada a nangpaltogan na kadakuada ti naminsan a daras.

Dagiti biktima ti naitaray iti Abra Provincial Hospital. Agingganat agdama at-large pay laeng ti suspetsa.

Naka-recover dagiti awtoridad iti crime scene ti basyo ti gauge 12 shotgun.

Maipalagip a daytoyen ti maikadwa a pasamak iti umuna a bulan ti hulio a no sadinno ti immunna ket bigat di kalman sadiay Bangued Central Market.

JULY 2, 2016- Nagtalinaed a blangko dagiti awtoridad no sinno ti suspetsa ken motibo ti napasamak a pammaltog ken pammapapatay idi agsapa idi kalman sadiay Farmers Market ti Bangued Public market.

Ti biktima ket ni Godofredo Tupasi Marquez, addaan asawa, negosiante ken residente ti San Miguel Bucay, Abra.
Iti pannakisarita ti DZPA CMN news kadagiti kameng ti Bangued MPS, kinita da ti CCTV iti lugar a nakaaramidan ti krimen, ngem saan a gumangana.

Maur-uray met ti otopsia ti bangkay ni Marquez no mano ti tama iti biktima.

Kagiddan daytoy a banag, nangawagan ti Bangued PNP iti tulong ti publiko nga ipakaammo da koma ti identity dagiti suspetsa.

JULY 2, 2016 – Naluktan itay bigat iti sanguanan ti Municipal Hall iti Bangued dagiti ballot boxes a naaramat idi naglabas nga eleksion ti barangay idi 2010.

Iti pannakisarita ti DZPA CMN news kenni Mrs. Amelia Bersamira, ICO Municipal Treasurer ti Bangued, ti ballot boxes ket 117 a maaramat inton umay nga Oktubre a Barangay elections.

Kuna ni Bersamira a dagiti dukomentos iti uneg na kas ti election return ti agbati iti kustodia ti opisina iti Municipal Treasury. Innayon na pay a ti pannakalukat dagitoy ket naimatangan a mismo ni Mr. Remando Basa iti Commission on Election. Kuna na pay a nabagaan dagiti partido political tapno imatangan ti pasamak , karaman dagiti kameng ti media. Dagiti dadduma a linaon daytoy ket napooran ken kalpasan na naisubli ti ballot boxes iti bodega ti Bangued.